Hrdaya Se

Mere labon ki muskan se ye na samajh lena ke Zindagi Kamil hai, Bas us rab ka naam leta, Uski naimaton ka shukriya ada karta hun, Aur har roz ki tarah is zindagi ke safar par nikal padta hu.

Trishul pe thaame kashi, Kailash ka wo wasi. Poojey jise nar nari, Aisa hai wo tripurari. Thame triloki ki kaman, Kiye jisne hala-hal ka paan. Jataon mein jiske Ganga ki dhar, Shakti hai jiska aadhar. Adi tu Anadi tu, Khand tu Akhand tu, Vyakt tu Avyakt tu, Ant tu Anant tu, Kahne ko ek shabd ek matra hai, Shav se Shiv tak ki yatra hai.

Lo aaj chala main duniya se, Saathi na mila koi dharti par. Jo apna sa lagu tumhe, Do phool chadhana arthi par. Ye maun asthiyan meri ab na tumhe satane aayengi, Apne ghamon ko saath liye yun agni mein jal jayengi. Balkha kar jab dhuna uthe padh lena tum inki bhasha, Yehi meri antim abhilasha, bas yehi meri antim abhilasha.

Must-E-Guroor Ki Taqat Ka Gumaan, Kuchh Is Kadar Tha. Lagta Tha Har Cheez Mere Kaboo Mein Hai. Par Is Reg-E-Waqt Ki Fitrat, Kuchh Is Kadar Hogi Ye Andaza Na Tha. Ke Mai Ise Samet ney Mein Laga Hun, Aur Ye Kambakht Fisalti Hi Ja Rahi Hai.  

Khuli qitab na ban, wo kab tere raaz padh jayenge tujhe ilm na hoga. Tujhe jaan, teri hi hasi udayenge tujhe ilm na hoga. Khuli qitab na ban, wo kab teri kahani jaan jayenge tujhe ilm na hoga. Chuskiyon ki mez pe, kab charche ka vishay banayenge tujhe ilm na hoga. Khuli qitab na ban, wo kab tujhe dost kehte kehte, muh mod jayenge tujhe ilm na hoga. Is rang-o-bu ki duniya mein, kis waqt rang badal jayenge tujhe ilm na hoga.