Haar Kar Thamna Nahi

Chand Kadam Piche Khenche the,
Par Yudh Se Palayan Nahi,
Na Mai Arjun Is Mahabharat ka,
Na Gandiv Ki Tankar Kahin,
Dhritrashtra Hote To Tumhari Vivashta Samajh leta,
Par Gandhari Ka Satkar Nahi,
Dronacharya, Na Tum Is Yug Ke,
Tumhare Chakravyuh Mein Wo Baat Nahi,
Bhed Kar Nikal Hi Aaya,
Cheete Ki Raftaar Nahi,
Kachhue Si Chaal Sahi,
Par Haar Kar Kabhi Thama Nahi.

Wo Puchte Hai Ab Kya Karoge,
Jeevan Yudh Kaise Ladoge,
Tumhara Mai Karzdaar Nahi,
Tumhare Saath Ki Koi Darkaar Nahi,
Mai Tha Behta Paani,
Ruka Ek Baar, To Padne Lagi Kai,
Varsho Baad Phir Maine Raah Hai Pai,
Kuchh Sath Chale,
Kuchh Chhitak Alag Hue,
Kuchh Ko Tarash Nayi Chamak Aai,
Kuchh Se Seekh Nai Disha Hai Pai,
Ganga Ka Veg Nahi,
Madham Si Dhaar Sahi,
Par Haar Kar Thamunga Nahi.

Na Krishn Mai Is Yug Ka,
Na Panchjanya Ka Shankhnaad Kahin,
Geeta Ke Shlok Nahi,
Par Ahankar Ke Bol Nahi,
Anubhav Se Ye Baat Kahi,
Shiv Hai Tera Aadhar,
Shakti Niwase Muladhar,
Bhagya Ka Sudarshan Nahi,
Karmo Ke Baan Sahi,
Machhali Ki Aankh Nahi,
Daanv Pe Teri Sakh Nahi,
Hridya Dhanush Par Dhairya Ki Pratyancha Kheech,
Atmavishwas Ke Baan Se Lakshya Ko Bheench,
Prayason Ke Rath Par Ho Sawar,
Bavandar Ki Raftar Nahi,
Mand Si Bayaar Sahi,
Par Haar Kabhi Thamana Nahi.